Bu gün Azərbaycanın ən az oxunan blogu, "Önər Blog"un 100-cü yazısı işıq üzü gördü. Bununla əlaqədar Bakı İcra Hakimiyyəti tədbirlər silsiləsi təşkil edəcək. Əvvəlcə Dənizkənarı parkda konsert proqramı təşkil olunacaq. Proqramda Azərbaycan estradasının ən tanınmış simaları, meyxana ustadları, söz xiridarları çıxış edəcəklər. Proqramı Azərbaycan Aşıqlar birliyin sədri Zəlimxan Yaqub aparacaq. Proqramdan sonra Milli Parkda atəşfəşanlıq olacaq. Tədbirdə "Önər Blog" şirkətlər qrupunun sahibi Araz Önərin də iştirakı gözlənilir.
Qeyd edək ki, Önər Blog keçən ildən işə başlasa da, fəaliyyətini rəsmi olaraq bu ilin İyun ayından başlamış sayılır.

100-cü postla əlaqədar Önər Bloga, Azərbaycan respublikasının prezidenti İlham Əliyev, Qarabağ Azadlıq Təşkilatının rəhbəri Akif Nağı, ABŞ prezidenti Barak Obama, Əl Qaidə lideri Usamə Benladen, İraq xalqının ümumilli lideri Səddam Hüseyn, İran İslam Respublikasının prezidenti Əhməd Nejat, Rusiya Liberal Demokratlar Partiyasının lideri Vladimir Jirnovskiy və Microsoft`un prezidenti Bill Geyts təbrik məktubu unvanlayıblar.

Nazi ideologiyasının ən humanist nümayəndəsi…

Əsgəri döyə-döyə öldürdülər

QayNar: Bərdə rayon hərbi komisarlığından həqiqi hərbi xidmətə çağrılmış adıçəkilən rayonun Yeni Həyat kənd sakini Aqşin Bolu oğlu Məmmədzadə Füzuli rayonunda qulluq etdiyi N saylı hərbi hissədə döyülərək öldürülüb.
Bu barədə məlumatı «Bizim Yol»a mərhum əsgərin atası Bolu Məmmədov verib. Onun sözlərinə görə, hadisə noyabrın 12-də olub: «Bizə xəbər verdilər ki, övladınız  vəfat edib». Amma uşağın ölümündən bir gün əvvəl həyat yoldaşımla yanına getmişdik. Oğlumun heç bir problemi yox idi. Səhəti də normal idi. İndi bizə deyirlər ki, oğlum guya, mənim oraya apardığım yeməklərdən zəhərlənib. Biz uşağın meyidinə baxanda işgəncə izləri açıq-aşkar görünürdü».
B.Məmmədov deyir ki, oğlunun cənazəsini dəfn etməzdən əvvəl onun üzərindəki işgəncə izlərinin video və foto çəkilişini aparıblar.
Öldürülən əsgərin atasının təqdim etdiyi fotodan göründüyü kimi əsgər Aqşin Məmmədovun bədənində çoxsaylı işgəncə izləri var.
Artıq Bərdədən seçilən millət vəkili Zahid Oruc baş verən dəhşətli olayla bağlı Hərbi Prokurorluğa və Müdafiə Nazirliyinə müraciət edib. 

Hər dəfə “Alma”nı alıb oxuyan zaman, Məmməd Süleymanovu, Həmid Herisçini və digər solaxay yazarların yazılarını görəndə dəhşətli dərəcədə təəccüblənirəm, həm də bir az əsəbiləşirəm. Ona görə yox ki, mənim bu insanlarla şəxsi qərəzliyim var. Qətiyyən… Mən onları heç tanımıram, münkündürsə heç tanımaq da istəmirəm. Amma məni maraqlandıran, bir sual var. Yəni bu xalqın, bu cəmiyyətin solaxaylara və “sol”a doğrudanmı ehtiyacı var?

Sol deyəndə mənim ağlıma ilk öncə Çe Qevara, Lenin, sonra isə "Kurtlar Vadisi Pusu" serialının qəhrəmanlarından biri Muro gəlir.
Çe Gevara - Kubada inqilabi lider, solçular üçün kumir, liberallar üçün isə elə də önəmli sifət deyil. Bəziləri üçün sadəcə mübarizə simvolu, bəziləri üçün qatil, bəziləri üçünsə zarafatlaşmaq üçün səbəbdir (məs: çe buraşka). O, həyat yoldaşının təsiri altında bütün solaxay proseslərə cəlb olunur. Və bir neçə il ərzində radikal marksistə çevrilir. 1956-cı ildə Kubaya ayaq basan 82 inqilabçıdan biri olur. 1959-cu ildə isə onun dəstəsi Havanaya daxil olur və müharibə qurtarır. Bir müddət La Kabana həbsxanasında müdir işləyir. Onun əmri ilə minlərlə əksinqilabçı məhkum güllələnir. Və hətta bir çoxlarının güllələnməsində Gevara özü iştirak edir. Sonra Kuba milli bankının rəhbəri və Sənaye naziri olur. Sonralar Fidel bəylə araları dəyir və Kuba vətəndaşlığından imtina edib oranı tərk edir.
Lenin - zənnimcə 20-ci əsrin dəhşətli terroristlərindən biridir. Ölkənin yarısını - uşağı, qadını, qocası ilə birlikdə güllələmiş və bu azmış kimi, özünü insanlığın xilaskarı, uşaqların dostu kimi təqdim etmişdir. Onun əsasını qoyduğu dövlətdə ən ağır cinayətlər baş vermiş, insanlara insanlığa sığmayan işgəncələr verilmişdir. Bir çox sovet ölkələrinin və o cümlədən də Azərbaycanın ziyalıları, əksinqilabçıları güllələnmişdir. Lenin inqilabdan sonra çox yaşamasa da, onun təbliğ etdiyi ideyalar bu günümüzə qədər bizi təqib etməkdədir.
Muro - "Kurtlar Vadisi Pusu" serialının ən gülməli personajlarından biri. Bu personaj solçuluğun nə qədər qeyri-səmimi və primitiv axın olduğunu göstərir. Adam öldürdükdən sonra, silahını təmizləyərək “lənət olsun içimdəki insan sevgisinə” ifadəsini işlədir. Yuxarıda saydığım iki nəfər də bunu etmirdilərmi?
İnsanlar heç bir zaman günahkar olmur. Günahkar həmişə sistem olur. Biz Azərbaycan polisini, müəllimini, insanını nə qədər tənqid etsək də bilirik ki, onlar da sistem qurbanlarıdır. Biz onları vəzifələrinin öhdəsindən pis gəldikləri üçün tənqid etmirik, biz onları sistemin qurbanı ola-ola buna göz yumduqları üçün tənqid edirik. Bütün ideologiyalar kağız üzərində mükəmməldir. Sosializmdən tutmuş, dinə qədər. Yəni, təsəvvür edin ki, ölkədə hamı sosialistdir və ya təsəvvür edin ölkədə hər kəs müsəlmandır. Onda təbii ki, bu ölkələr öz vətəndaşlarının səadətini təmin edə biləcəklər. Amma bu gün dünya rəngarəngdir. Və bir ailədə tamamilə fərqli düşünən fərdlər var. Liberal dəyərlər elə bu fərdlər üçündür. Liberalizm yalnız liberallara xidmət etmir. O həm də solçulara, millətçilərə - hər kəsə xidmət edir. Və ən əsası odur ki, liberal inqilablardan sonra əksinqilabçılar güllələnmir. Sizə bir sual verim, bəs Çe Gevaranın güllələdiyi minlərlə əksinqilabçının xilaskarı kim olacaqdı? Cavab yoxdu, heç olmayacaq da. Qətiyyən islahat tərəfdarı olmayan bu axında, hətta bir-birlərinə təhqir olaraq reformist də deyirlər. Əgər solçular ibtidai icma quruluşunda peyda olsaydılar, onda yəqin ki, insanlar hələ də qəbilə halında yaşamaqda davam edəcəkdilər.
İndi bir anlığa təsəvvür edin ki, (ulu tanrı bu bəlanı bizdən uzaq eləsin) Məmməd bəylə Həmid bəy ölkədə inqilab edib, hakimiyyətin başına keçiblər. Adım kimi əminəm ki, Azərbaycanda Dalğa adında bir şey qalmayacaqdı. Hamımızı güllələyəcəkdilər. Dənizdəki dalğanın da adını dəyişib ləpə qoyacaqdılar. Ləpəyə dalğa deyəni də həbs edəcəkdilər… Bizə bu lazımdırmı? İndi bir anlığa, sizləri yox, tək özümü düşünüm. Mənə bu lazımdırmı? Yox! Ona görə, üzümü Həmid bəyin və Məmməd bəyin misalında bütün solaxay yazarlara tutub deyirəm ki, siz bizə lazım deyilsiniz. Gedin Raul Kastrodan Kubada sığınacaq istəyin. Siz onlara lazımsınız. Çünki 1-2 il də belə getsə, Kubada da da rejim dəyişəcək. Gedin rejimi möhkəmləndirməkdə Raul və onun həmkarlarına yardımçı olun.

P.S.: Bir dəfə Məmməd Süleymanovun bloqunda oxumuşdum ki, solçuluq romantik axındır. Bir az gülməli gəldi. “Kapital”ı da oxuyub romantik olmaq olar?

Onların xilaskarı kimdir? Musamı, İsamı, Məhəmmədmi?

Azərbaycanın ən az oxunan bloglarından biri Önər Blog Azərbaycan Bloglaşdırma Komitəsinin qara siyahısına düşüb. ABK-nın mətbuat xidmətindən verilən açıqlamada səbəb olaraq blogda Azərbaycanın milli mental dəyərlərinin tənqid olunması göstərilir. Komitə səlahiyyətliləri blogun bağlanması üçün məhkəməyə müraciət edəcək. Məhkəmə ABK-nın mövqeyinə uyğun qərar qəbul edərsə, Önər Blog bağlanacaq.

Qeyd edək ki, bu məsələ ilə bağlı Önər Blogun sahibi Araz Önərlə əlaqə saxlamağa çalışdıq, amma Araz bəyi tapa bilmədik. Bizə yaxın olan mənbələrin verdiyi məlumatlara əsasən, Araz bəy ölkəni tərk etməyə hazırlaşır. Araz Önər həmçinin Önər Blogun səhmlərini də satışa çıxaracaq.

Nəriman Qasımoğlu

Azərbaycanda islam deyəndə, bir çoxlarının ağlına molla və məscidlər düşür. Bəziləri müsəlmançılığı əsasən yas və kəbin mərasimləri, nəzir qutuları, hətta mövhumatçılıqla əlaqələndirir. Bu səbəbdən də islam dininə münasibət də birmənalı olmur. Mollaların özləri isə çox vaxt iddia edirlər ki, onlarsız islam dini ola bilməz. Mollaların Allaha daha yaxın olduğunu, onların duasının daha tez eşidildiyini fikirləşənlər də var.

Bəs əslində islamda molla və məscidlərə hansı yer ayrılıb? Tanrı ilə insan arasında vasitəçinin olmasına ehtiyac varmı?

«Azadlıq» radiosunun «İslam və demokratiya» verilişində bu suallara cavab axtarılıb.

Proqramın qonağı dinşünas-alim Nəriman Qasımoğlu deyir ki, Qurani-Kərimə görə, Tanrı ilə insan arasında heç bir vasitəçi yoxdur:

«İslam dini tək Allahlılığı son variant kimi təlqin edir. Burada eyni zamanda vasitəçi institutlar, vasitəçi zümrə də ola bilməz. Müqəddəs kitabımızda Allahın birliyinə şahidlik edənlər Allahın özü, mələklər və elmdə dərinləşmiş kimsələr – yəni alimlərdir. Çünki Quranda nazil olan kosmik informasiya ayələrin timsalında elm kimi təsnifləndirilir. Yəni alimlərə daha çox dəyər verilir».

N.Qasımoğlu deyir ki, bəzən özlərini dindarlar kimi qələmə verənlər əslində dinin mahiyyətindən uzaq olan, hətta bəzən insanlığa zidd olan dəyərləri təbliğ etməklə məşğuldurlar:

«Allaha yaxınlıq yalnız iman duyğusu ilə ölçülür. Bu, hansısa yer, məkan və zamanla, bu və ya digər xalqa mənsubluqla ölçülmür. İbadət yerlərinə gəlincə, məscidlər, kilsələr və sinaqoqlar haqqında ayə var və orda bildirilir ki, bunların hamısı Allahın evidir və orada yalnız Allahın adı anılmalıdır. Amma bilirik ki, bəzən məscidlərdə tamam başqa mövzularda söhbətlər aparılır».

Alim söyləyir ki, məscid sözünün hərfi anlamı «səcdə edilən yer və zaman» deməkdir. Amma nədənsə çox vaxt məscidi elə ibadət olunan yer kimi qəbul edirlər, zaman anlayışı burdan çıxarılır:

«İnsan hardasa ibadət edirsə (bu yer lap təyyarənin hansısa küncü ola bilər) o yer avtomatik olaraq məscidə çevrilir. İbadət bitəndən sonra həmin yer məscidliyindən çıxır. Şərt deyil ki, insan ibadəti mütləq məsciddə həyata keçirsin. Ümumiyyətlə, ibadətlər şərtlərə bağlanmır. İslamda ibadət şəkilləri sərhədsizdir. Salehi-əməl, xoş söz, kiminsə könlünü almaq, elmlə, yaradıcı işlərlə məşğul olmaq da öz-özlüyündə bir ibadətdir».

Nəriman Qasımoğlu söyləyir ki, insan ilahi ilə dialoqa girəndə anlamadığı dildən istifadə etməli deyil. Yəni, namazın ərəb dilində qılınması vacib deyil.

«Bu, zaman-zaman mövhumat böyüklərinin istifadə etdiyi, dinə zərbə vuran, insanları qaranlıqda saxlamaqdan ötrü istifadə etdikləri arqumentlərdir».

Qalatasarayımız, Fənərbaxça matçının hazırlıqlarını Florya Mətin Oktay Təsislərində etdiyi məşqlə davam etdirdi. Baş məşqçimiz Michael Skibbe rəhbərliyində mətbuata və tərəfdara qapalı reallaşdırılan məşq, isinmə hərəkətləriylə başladı. İdmanın əsas hissəsində Benfica qarşılaşmasında oynayan oyunçular yenilənmə qaçışı edərkən, qarşılaşmada oynamayan və az oynayan oyunçular qaçışın ardından Cevat Gülər rəhbərliyində xüsusi bir çalışma ilə məşqlərə davam etdilər.

Mehmet Topal, Emre Güngör, Aydın Yılmaz və Shabani Nonda da komanda ilə birlikdə məşqlərə qatıldılar. Harry Kewell, müalicəsinin ardından komandadan ayrı məşq etdi

İsveçdə müalicəsini başa vuran və Türkiyədə Qalatasarayın həkimləri tərəfindən müalicəsinə davam etdirilən Tobias Linderoth məşqlərə qatılmadı. Onun müalicəsi həkimlər tərəfindən davam etdirilir.

Qalatasarayımız, sabah axşam edəcəyi məşqlə Fenerbahce matçının hazırlıqlarını tamamlayaraq düşərgəyə girəcək.

Noyabrın 7-də axşam saatlarında Naxçıvan Muxtar Respublikasının “N” saylı hərbi hissəsində əsgər öldürülüb. Müdafiə Nazirliyindən ANS PRESS-ə verilən məlumata görə, hərbi hissədəki növbədə olan Sərxan Salman oğlu Nemətov əsgər yoldaşının silahından açılan atəş nəticəsində dünyasını dəyişib. Ona əsgər yoldaşı Qurban Məmməd oğlu İbrahimov tərəfindən atəş açıldığı bildirilir. Hələlik hadisənin səbəbləri bilinmir.
ANS PRESS-in bölgə müxbirinin məlumatına görə, 1989-cu il təvəllüdlü Sərxan Nemətov 2007-ci ilin iyun ayında Xaçmaz Hərbi Komissarlığından hərbi xidmətə çağırılmışdı. Əsgər Naxçıvan Muxtar Respublikasının Şahbuz rayonundakı hərbi hissələrdən birində qulluq edib. Artıq onun meyiti Xaçmaza gətirilib və bu gün ailəsinə təhvil veriləcək. Müdafiə Nazirliyinin mətbuat xidmətinin rəhbəri Eldar Sabiroğlu isə faktla bağlı cinayət işi qaldırıldığını deyib. Faktla bağlı araşdırma aparılır.