Önər Blog

Əhval-Ruhiyyə:Rahat

Noyabrın 7-də axşam saatlarında Naxçıvan Muxtar Respublikasının “N” saylı hərbi hissəsində əsgər öldürülüb. Müdafiə Nazirliyindən ANS PRESS-ə verilən məlumata görə, hərbi hissədəki növbədə olan Sərxan Salman oğlu Nemətov əsgər yoldaşının silahından açılan atəş nəticəsində dünyasını dəyişib. Ona əsgər yoldaşı Qurban Məmməd oğlu İbrahimov tərəfindən atəş açıldığı bildirilir. Hələlik hadisənin səbəbləri bilinmir.
ANS PRESS-in bölgə müxbirinin məlumatına görə, 1989-cu il təvəllüdlü Sərxan Nemətov 2007-ci ilin iyun ayında Xaçmaz Hərbi Komissarlığından hərbi xidmətə çağırılmışdı. Əsgər Naxçıvan Muxtar Respublikasının Şahbuz rayonundakı hərbi hissələrdən birində qulluq edib. Artıq onun meyiti Xaçmaza gətirilib və bu gün ailəsinə təhvil veriləcək. Müdafiə Nazirliyinin mətbuat xidmətinin rəhbəri Eldar Sabiroğlu isə faktla bağlı cinayət işi qaldırıldığını deyib. Faktla bağlı araşdırma aparılır.

Əhval-Ruhiyyə:Sakit

Saat 05:00-da saatların əqrəbləri 1 saat geri çəkiləcək

Bu gecə Azərbaycan qış vaxtına keçəcək. Standartlaşdırma, Metrologiya və Patent üzrə Dövlət Agentliyindən verilən məlumata görə, oktyabrın 25-dən 26-na keçən gecə saat 05:00-da saatların əqrəbləri 1 saat geri çəkiləcək və bununla da Azərbaycanda yay vaxtı ləğv olunacaq. Qeyd edək ki, qış vaxtına keçid Nazirlər Kabinetinin 17 mart 1997-ci il tarixli, 21 saylı qərarına əsasən həyata keçirilir

Əhval-Ruhiyyə:Əla

Azərbaycan Respublikasının prezidentliyinə virtual namizəd Şiraslan Qurbanov bu gün BBC,WGBH, PRI-nin ortaq layihəsi olan The World-un müzakirə mövzusu oldu. Şiraslan dayının oktyabrın 15-də 70 yaşının tamam olmasını eşidən dinləyicilər, The World aparıcılarına zəng edərək təbriklərini çatdırıblar. Qeyd edək ki, xəbər layihənin ən çox email göndərilən 3-cü reportajı olub.
Bu, virtual namizəd Şiraslan dayının beynəlxalq mətbuatda ikinci çıxışı idi. Bundan əvvəl Türkiyənin Anadolu agentliyi dayı haqqında xəbər yaymışdı. Yaxın zamanlarda Şiraslan dayı, dünyanın bir çox ölkələrinin KİV-lərində öz bəyanatlarını verəcək.

Xəbəri buradan dinləyə bilərsiniz:
http://www.theworld .org/?q=node/ 21757

Əhval-Ruhiyyə:Gülməli

Bir neçə saat bundan əvvəl seçkinin ilkin nəticələri açıqlandı. İlham Əliyev 92 faizlə seçkidə parlaq qələbə qazanmışdı. Və mən şübhə eləmirəm ki, seçkilər şəffaf keçib. İlham Əliyevi xalq prezident seçdi. Eşitdiklərimin və müşahidə elədiklərimin əsasında belə qənaətə gəlmişəm.

Mən özüm seçkilərdə lazımınca iştirak elədim. Həm müşahidə elədim, həm də səs verdim. Daha eldən gizli, Allahdan nə gizli - bullitenin yuxarı hissəsinə Xalqın namizədi Şiraslan yazdım, yanında da bir kvadrat çəkib içini qaraladım. Dostlarım da seçkidə aktiv iştirak elədi. Hətta bəzilərinin yerinə səs verən də tapıldı. Məsələn, dostlarımdan biri günorta saatlarında səs verməyə getdi və ona siz artıq səs vermisiniz deyə bildirdilər. O da sevinə-sevinə evinə qayıtdı. Sevinirdi, çünki daha pərdəli otağa girməyə ehtiyac qalmamışdı. Digər dostum mənim kimi müşahidəçi idi. Dediyinə görə seçkidə nəticəyə təsir göstərməyən xırda qanun pozuntuları oldu. Belə ki, məntəqə rəhbərliyindən bir nəfər seçki qutularına altdan-altdan bullitenləri ötürürmüş. Rəhbərliyin üzvü, bir xanım isə bullitenləri onun əlindən alaraq, “Əhməd Haradadır?” filmindəki “üzumu bax belə yığarlar” səhnəsini xatırladan jestiylə “bullitenləri bax belə atarlar” deyib, onları qutuya atdı. Məntəqələrin birində isə məntəqə rəhbərləri səsvermə bitənə yaxın Azərbaycan xalqına xas bir tərzdə gözəl süfrə açıbmışlar. Hamının sağlığına içəndən sonra, Dalğa Gənclər Hərəkatının sədrliyinə namizəd İlkin Əlisoyun şərəfinə də bir sağlıq deyiblər. İlkin də təbii ki, bunların hamısını qeydə alıb. Ramin Hacılının müşahidəçi olduğu məntəqədə isə maraqlıbir fakt qeydə alınıb. Saat 2-3 radələrində məntəqənin qabağında bir neçə avtobus peyda olub. Özü də içi dolu seçici. Hamısı hurrey deyib məntəqəyə daxil olub kollektiv şəkildə səs veriblər. Hacılı da ehmalca avtobusların nömrələrini özü üçün qeyd edib. Hacılının qardaşı isə məntəqə rəhbərlərini bullitenləri kütləvi şəkildə qutuya atarkən yaxalayıb.
Təbii ki, bütün bunlar seçkinin nəticəsinə heç bir təsir göstərmədi. Fakt prezidenti xalq seçdi. Prezident özü gəlib bullitenləri kütləvi şəkildə qutuya atmadı ki. Ya da prezident kiminsə yerinə səs vermədi ki. Hamısını xalq elədi. Seçkilər tam şəffaf, demonkratik şəraitdə keçdi. Beləliklə, “rıbak Hafiz”in qardaşı İlham Əliyev prezident seçildi. Bu münasibətlə xalqımı təbrik edirəm. Onlar prezidentin seçilməsində çox önəmli rol oynadılar. Neçə belə seçkilərdə görüşək. Ən pis seçkimiz belə keçsin…

Əhval-Ruhiyyə: Məzəli

"Qaynar.Info" bir neçə dəqiqə bundan əvvəl maraqlı bir ilkə imza atdı. Sayt adminləri və yazarları prezident seçkilərinin nəticələrini açıqladı. İndi həmən nəticələri sizə olduğu kimi təqdim edirik.

Qeyd: Bir neçə saat sonra MSK, agentliklər və xəbər saytları təqribən aşağıdakı kimi bir məlumat yayacaq

Biz isə həmişəki Azərbaycanda ayılmamaq ümidiylə yatmağa gedirik

QayNar: Bu gün Azərbaycanda prezident seçkiləri keçirilib. Səsvermə səhər saat 08.00-dan başlayıb. Seçkilərdə 7 namizəd iştirak edib.
Bunlar YAP-ın namizədi İlham Əliyev, BAXCP-nin namizədi Qüdrət Həsənquliyev, Ümid Partiyasının namizədi İqbal Ağazadə, Müasir Müsavat Partiyasının sədri Hafiz Hacıyev, Azərbaycan Liberal Demokrat Partiyasının namizədi Fuad Əliyev, Böyük Quruluş Partiyasının namizədi Fazil Qəzənfəroğlu və bitərəf namizəd Qulamhüseyn Əlibəylidir.

Ölkə üzrə 4 milyon 866 min 335 seçicinin təqribən 70 faizi 125 Seçki Dairəsi üzrə 5359 seçki məntəqədə səs veriblər.

Azərbaycandan kənarda yaşayan seçicilər üçün xarici ölkələrdə olan diplomatik nümayəndəliklərdə isə 33 seçki məntəqəsi yaradılıb. Xaricdə 10 minə yaxın seçici səs verə bilib.

Saat 19.00-da başa çatan səsvermədən sonra səslərin sayılmasına başlanıb.
MSK-nın açıqladığı ilkin rəqəmlərə görə, seçkilərdə seçicilərin təqribən 75 faizi iştirak edib. Tam olmayan hesablamalara görə, seçicilərin 80 faizə yaxın qismi yenidən İlham Əliyevə etimad göstərib.

Daha dəqiq məlumatlar isə bir gün sonra açıqlanacaq.

Beləliklə, İlham Əliyev ikinci müddətə ölkənin prezidenti seçilib və tarixə Azərbaycanın 6-cı prezidenti kimi düşüb.

Seçki prosesində bəzi xırda qanun pozuntuları aşkarlansa da, bu, ümumi nəticəyə təsir edəcək səviyyədə olmayıb.

Xatırladaq ki, ölkə müstəqillik əldə edəndən sonra ilk prezident seçkiləri 1991-ci il sentyabrın 8-də keçirilib. Səsvermə hüququna malik seçicilərin 84,4 faizinin iştirak etdiyi seçkilərdə səslərin 98,5 faizini toplayan Ayaz Mütəllibov qalib elan olunub.
1992-ci il iyunun 7-də keçirilən ikinci prezident seçkilərinin qalibi isə AXC sədri Əbülfəz Elçibəy olub. Seçicilərin 76,3 faizinin səsverməyə qatıldığı seçkilərdə Əbülfəz Elçibəy 59,4 faiz, digər namizədlər isə 38 faiz səs toplayıblar.

1993-cü il avqustun 29-da prezident Əbülfəz Elçibəyə etimad göstərilməsi ilə bağlı referendum keçirilib və səsverməyə qatılan 3,767, 928 seçicinin 92,02 faizi dövlət başçısına etimad göstərməyib. Referendumdan sonra oktyabrın 3-nə təyin olunan növbədənkənar prezident seçkiləri həm də ən yüksək seçici fəallığı ilə yadda qalıb. Səsvermə hüququna malik seçicilərin 97,6 faizinin iştirak etdiyi üçüncü prezident seçkilərində Heydər Əliyev səslərin 98,8 faizini toplayaraq dövlət başçısı seçilib.
1998-ci il oktyabrın 11-də Azərbaycanda dördüncü dəfə keçirilən prezident seçkiləri günü səsverməyə 3358465 seçici qatılıb (seçicilərin ümumi sayının 79,18 faizi). Seçicilərin 76,11 faizinin səsini qazanan Heydər Əliyev növbəti müddətə prezident seçilib.

Beş il əvvəl, 2003-cü il oktyabrın 15-də isə müstəqil Azərbaycan tarixində beşinci prezident seçkiləri keçirilib. Bu seçkilərdə adı seçici siyahılarına daxil edilmiş Azərbaycan vətəndaşlarının 71,23 faizi səsverməyə qatılıb. Seçkilərin nəticələrinə görə, 76,84 faiz səs toplayan İlham Əliyev qalib gəlib. // qaynar.info

Əhval-Ruhiyyə:Hirsli

Onlar səni radioda tərifləyir,
qəzetlərdə mədh eləyir.
Onlar səni telegüzgü dağlarında vəsf eləyir.

- Nizamini yetirmisən! Kəhkəşansan! - deyir biri.
- Nəsimini yetirmisən! Qəhrəmansan! - deyir biri.

Biri deyir: - Şərqin gözü!
Biri deyir:- Yer üstündə cənnət özü!

Şadlığından şıllaq atır,
Biri deyir: - Ay can! Ay can!
Sən inanma məddahlara, Azərbaycan!

Читать полностью »

Əhval-Ruhiyyə:Təəssüflənmiş

"Prezident ya mən olacam, ya da qardaşım!" - Hafiz Haciyev

Azərbaycan növbəti prezident seçkisini də arxada qoydu. Hər dəfə daha da passiv və maraqsız keçən seçki bu dəfə daha maraqsız oldu. Müşahidə elədiyim məntəqələrdə səs verənlərin böyük əksəriyyəti qocalar idi. Əvvəlki seçkilərdən fərqli olaraq müxalifətin də güclü alternativi yox idi. Təbliğat prosesi də çox qısa oldu. Mitinqlərin keçirilməsinə icazə verilmədi. Universitetlərdə tələbələri kütləvi şəkildə seçkiyə göndərdilər. Seçkiyə getməyənləri də yəqin tənbeh edəcəklər.
Azərbaycan bu seçkini də bir təhər yola verdi. Məncə xalq, seçilən prezidentə elə də güclü baş ağrısı olmayacaq. Çünki artıq heç kəsin buna ümidi qalmayıb. İnsanlar başlarını aşağı salıb bir qarın çörək uğrunda mübarizə aparırlar. Haqq, hüquq, ədalət tamam yaddan çıxıb.
Nəisə çox danışmayım. Seçkiniz mübarək, əziz xalq!

Əhval-Ruhiyyə:Rahat & Sakit

Önər blog olaraq mən və otaq yoldaşlarım qəribə bir araşdırma apardıq və belə bir nəticəyə gəldik ki:

• Azərbaycanda prezidentliyə iddialı olan hər kəs LİDER TV-dən qorxur.
• Azərbaycanda prezidentliyə iddialı olan hər kəs “mavi”lərdən qorxur.
• Azərbaycanda prezidentliyə iddialı olan hər kəs hakimiyyətdən qorxur.
• Azərbaycanda prezidentliyə iddialı olan hər kəs açıq siyasətdən qorxur.
• Azərbaycanda prezidentliyə iddialı olan hər kəs uduzacağını bilir və prezident seçkilərini udmaqdan qorxur.
• Azərbaycanda prezidentliyə iddialı olan hər kəs mitinqlərə apardığı yüzlərlə insandan qorxur.
• Azərbaycanda prezidentliyə iddialı olan hər kəs, bir prezidentə lazım olan bütün müsbət xüsusiyyətləri qazanmaqdan qorxur.
• Azərbaycanda prezidentliyə iddialı olan hər kəs, qorxur….

p.s. Azərbaycanda prezidentliyə iddialı olanların kumiri Barak Obamadır.  İlham Əliyevdən başqa. Onun kumiri sabiq prezident Boris Yeltsindir.

Əhval-Ruhiyyə: Məzəli & Kədərli

İslamda Qiyamət günü barədə belə bir məqam var ki, valideyn öz övladını tanımayacaq, hər kəs öz haqqını tələb edəcək. Çox uzağa getməyin, bu halları günümüzdə Azərbaycanda da görmək olar. Harda desəz, elə onda da çox uzağa getməyin Xarici Pasport verilmə məntəqələrində. Bu gün, səhər (09.07.2008) mən orada idim. Deyə bilərəm ki, Qiyamət günü gəlməsə də, orada əsl qiyamət var idi. Ata oğluna güzəştə getmirdi, toylarda bir yerdə yiyib-içən oğlanlar bir-birləri ilə dava edirdilər, qadınlar az qala saçyolduya çıxsınlar. Heç bir "zakon", heç bir "ponyatka" burda girmirdi. Əsl həsənsoxdu, məmmədbasdı idi. Bütün bunlar təbii ki, növbə üstündə idi. Burada mədəniyyətdən danışmaq istəmirəm. Çünki mədəniyyətdən əsər, əlamət yox idi. Bu məqamda mən öz xalqımı qınamaq da istəmirəm. Belə şey dünyanın hansı yerində olsaydı, elə həmin həsənsoxdu olacaq idi. Sözüm onda deyil. Sözüm ondadır ki, ay mənim "şərəfli" məmurlarım, bu məntəqələri heç olmasa 3-4 dəfə artırın, həm siz pulunuzu qazanın, həm də camaata rahat olsun. Daha niyə görə həm özünüz əziyyət çəkirsiniz, həm də camaata bu qədər əziyyət verirsiniz. Yoxsa ,olmaya, siz də, sado-mazoxistsiniz?

Əhval-Ruhiyyə:Sakit

Önər blog olaraq, balaca bir araşdırma elədik və hansı ölkələrin hansı sahədə qeyri-qanuni fəaliyyət göstərdiyini üzə çıxardıq.Bu sıralamada hansı ölkələrin, hansı qanundankənar işlə məşğul olduqları barədə məlumat olacaq. Sıralamada 5 ölkə yer alır. Və bu 5 ölkənin hər bir-birindən çox fərqli mədəniyyətlərə, siyasi sektora sahib ölkələrdir:

Şəkil: Outlaws filmindən (soldan sağa:Sean Harris, Danny Dyer, Sean Bean, Rupert Friend and Lennie James)

Çin. Bu ölkə, qeyri-qanuni narkotika, siqaret və əsasən də silah alveri məşğuldur. Qeyri-rəsmi mənbələrə əsasən, ölkə qanundankənar silah alveri üzrə dünyada birinci yerdədir.

Birləşmiş Ərəb Əmirlikləri. Əmirliklərdə isə vəziyyət daha fərqlidir. Burada nə siqaret, nə də narkotika alveri çox da məşhur deyil. Əmirliklər qeyri-qanuni insan alveri - qadın alveri ilə məşğuldur. Əmirliklərə qadınlar əsasən, Rusiyadan, Azərbaycandan, Gürcüstandan müəyyən vədlərlə gətirilir. Sonra isə onları bədənlərini satmağa məcbur edirlər.

Türkiyə. Türkiyədə də vəziyyət çox ürəkaçan deyil. Türkiyə qeyri-qanuni, silah, qadın və orqan alveri ilə məşğuldur. Ölkəyə qadınlar əsasən, Rusiya, Ukrayna, Moldova və Azərbaycandan gətirilir. Burada da B.Ə.Ə.-də olduğu kimi qadınlar müəyyən vədlərlə aldadılır. Passportları əllərindən alınır və fahişəliklə məşğul olmağa məcbur edilir.

Rusiya. Rusiya, qadın alveri üzrə ən geridə qalmış ölkədir. Ölkədə demək olar ki, qadın alveri ilə məşğul olmullar. Bunun əksinə isə silah və narkotik maddələrin alveri ölkədə sürətlə inkişaf etməkdədir.

Azərbaycan. Azərbaycan isə bu yöndə bütün sahələr üzrə inkişaf edib. Ölkədə həm qadın, həm narkotika, həm siqaret qaçaqmalçılığı var. Qadın alveri ilə məşğul olan digər ölkələrdən fərqli olaraq, burada yerli qadınlar bu sahədə fəaliyyət göstərir.